„Сега само имам потреба да одморам и да јадам нешто затоа што бев долго време на море“ – рече Австралиецот Тим Шедок, кој по дефектот на бродот предизвикан од силна бура, 2 месеца со своето куче преживеал на отворено море. Неговата неверојатна приказна е топ тема во светските медиуми.
Тим Шедок и кучето Бела тргнале од Мексико во април и планирале да патуваат околу 6.000 километри пред да се закотват во Француска Полинезија.
Набргу по тргнувањето, катамаранот бил оштетен, а електронската опрема била неупотреблива.
Шедок (51) и неговото куче го јаделе својот улов и пиеле дождовница пред да бидат пронајдени од мексикански брод.
„Имам само опрема за риболов“, изјави тој за австралискиот 9News.
Тим и Бела наскоро би требало да се вратат во Мексико.