Долгогодишниот уредник и водител на ТВ Загреб и Хрватската телевизија, Мирослав Лилиќ, почина на 79 години. Тој ќе остане запаметен по тоа што прв објави за смртта на Јосип Броз Тито.
Роден во 1944, Лилиќ дипломирал книжевност, а во кариерата работел како новинар, уредник и директор на програмата. Едно време беше и претседател на управата на дискографската куќа „Кроација рекордс“. Во својата автобиографија, Лилиќ опиша што се случувало во студиото кога требаше да ѝ ја соопшти тажната вест на целата Југославија.
„Кога дојде веста, веднаш ја прекинавме програмата. Ја зедов веста од ‘Танјуг‘ без препишување и тргнав кон студиото. Гледам во камерата и читам: ‘Претседателството на Социјалистичка Федеративна Република Југославија и Претседателството на Централен комитет на Сојузот на комунистите на Југославија до работничката класа и народите на Југославија… почина другарот Тито‘. Откако ја прочитав веста, по неколку секунди сакав да станам од столчето, кога сфатив дека место црни, носам сини фармерки. Седам така, режисерот ме држи во кадарот, па додадов прво што ми падна на памет: ‘Од овој момент, Југословенската радио-телевизија почнува со емитувањето на вонредна програма‘“, се присети Лилиќ.
Во 1991 година, тој го лансирал третиот програм на ХТВ и ја водеше воената програма „За слобода“. Од 1994 до 2004 година бил шеф на управниот одбор на „Кроација рекордс“, а од 2004 година до неговото пензионирање во 2009 година бил консултант во ХРТ.
Во 2011 година ја објавил својата автобиографија „Без цензура“, а
меѓу гледачите остана запаметен и по објавата за смртта на претседателот на Југославија, Јосип Броз Тито.