Велика Британија во петок, по три и пол години макотрпен „развод“, ќе стане првата земја што ја напуштила Европската унија.
Процесот Брегзит ќе се заврши во петок во 23 часот по локално време, или полноќ во Централна Европа.
Помеѓу Велика Британија и другите 27 земји, сè друго допрва треба да се договори. Усогласениот распад е само почеток на преговорите за регулирање на идните односи.
Премиерот Борис Џонсон ќе се обрати пред нацијата таа вечер.
Тој сега се претставува себеси како обединувач за земјата, велејќи дека е време сите, без разлика дали гласале за Брегзит или не, заедно да се свртат кон иднината. Оваа задача нема да биде лесна за него, бидејќи парламентите на Шкотска, Велс и Северна Ирска го отфрлија неговиот закон за Брегзит.
Џонсон застана на чело на владата на крајот на јули и успеа во она што не го направи неговиот претходник Тереза Меј. Тој се согласи со Брисел за некои измени во договорот за Брегзит, ја елиминираше опасноста од враќање на физичката граница во Ирска и, благодарение на огромното мнозинство постигнато на изборите во почетокот на декември, го направи тоа лесно преку парламентот.
Законот го потпиша и кралицата Елизабета Втора на 23 јануари.
За крај на 47 годишните односи меѓу Велика Британија и Унијата, останува само една друга формалност. Договорот мора да го потврдат европратениците кои ќе го сторат тоа во среда.
Симболичен датум
Датумот на заминување, 31 јануари, всушност е симболичен, бидејќи малку ќе се промени во реалноста. Договорот предвидува преоден рок, до 31 декември, до кое време двете страни мора да се договорат за идните односи, особено трговијата. До тогаш, Велика Британија ќе ги применува европските правила, но нема да има право на глас.
Знак дека започнува нова ера во односите е назначувањето на амбасадор на ЕУ во Велика Британија, кој ќе започне да ја извршува функцијата од 1 февруари.
Борис Џонсон сака што поскоро да ги заврши преговорите за идните односи и цврсто го отфрла продолжувањето на периодот на транзиција. Тој неколку пати рече дека сака договор сличен на оној што ЕУ го има со Канада.
Во исто време, Лондон сака да преговара за свои договори за слободна трговија со други земји, особено со Соединетите држави. Претседателот Доналд Трамп неодамна објави „голем“ договор со Велика Британија во Лондон.
Сепак, преговорите може да бидат тешки бидејќи Лондон најави дека ќе го задржи дигиталниот данок и покрај незадоволството на САД.
Американскиот државен секретар Мајк Помпео пристигнува во Лондон на 29 јануари за да се сретне со Џонсон, да ги потврди „специјалните односи“ и да разговараат за нивно продлабочување.
