Истражители од Обвинителството за организиран криминал, денеска ја проверуваа финансиската документација и исплатата на бонуси на специјалните обвинители која изнесувала по повеќе десетици илјади евра. Истражителите на Русковска прибираат документи за да проверат дали имало злоупотреби при исплатата на бонусите за вработените во Специјалното обвинителство.
„Се одзема само финансиска документација. Станува збор за предистрага која е отворена по допрен глас откако се објави висината на додатоците во јавноста. Доколку се утврди дека има основа за сторено кривично дело ќе се отвори и истрага за бонусите во СЈО“, вели обвинителот Љубомир Јовевски.
Преку интернет платформата „Отворени финансии“, се открија високите парични додатоци. Специјалните обвинители ги земале како надомест за да ги чуваат тајните кои ги дознаваат од разните истраги. Базата покажа дека од формирањето на СЈО до сега, најголем бонус земала поранешната шефица на СЈО, Катица Јанева. Станува збор за околу 157 илјади евра. Нејзината тогашна заменичка, Елизабета Јосифовска за дискреција и доверливост добила 107 илјади евра. Лиле Стефанова, Фатиме Фетаи, Бурим Рустеми, Гаврил Бубевски, Трајче Пеливанов и Ленче Ристовска земале помеѓу 80 и 93 илјади евра, екстра од платата.
Но, освен специјалните обвинители, бонуси земале и останатите вработени во СЈО кои биле дел во случаите каде се обработувале прислушуваните разговори.