Со почетокот на годинашната жетва се вратија и старите проблеми на домашните земјоделци, кои ги имаа во изминатите години. Имено, тие се соочуваа со неизвесноста од (ниската) цена и несигурниот откуп на произведеното лебно жито. Кај македонските мелничари и преработувачи нема интерес за откуп на домашната пченица, додека за најавеното преземање за одредени количества се нуди цената од 10 до 11 денари за килограм. Оваа цена, според земјоделците, е далеку од трошоците што тие ги имаат направено, поради повисоките трошоци за сеидба и одржување на вегетацијата на пченицата, поради поскапувањето на ѓубривата, горивото и средствата за заштита на растенијата. Националната земјоделска мрежа – Земјоделскиот институт од Скопје изработи производни цени, кои за пченицата изнесуваат 19 денари. Со оглед на тоа дека откупната цена е 11 денари, тие сметаат дека се исполнети законските одредби за интервентен откуп од страна на државата.
Од Министерството за земјоделство излегоа со став дека по иницијативата на потсекторската група за жито преку Интервентната програма ќе се креира нова мерка со која се предвидува поддршка за пченицата, преку дополнителни три денари за продаден килограм пченица кај регистрирани откупувачи во период до 31 август 2023 година. МЗШВ заедно со потсекторската група за жито, до Агенцијата за стоковни резерви ќе упати барање планираната јавна набавка на 15.000 тони пченица, за потребите на стоковните резерви, наместо во еден, да биде поделена во пет лотови од по 3.000 тони, давајќи предност на домашните количества пченица.
Од Министерството за земјоделство се обидуваат да ја смират состојбата со откупот на пченицата преку давање субвенции, но тоа не е доволно. Неопходно е спроведување трајни решенија, со кои ќе се надминат проблемите при откупот, велат од Националната земјоделска мрежа.
– Нам ни е јасно дека сите учесници во земјоделското производство имаат сопствени интереси. Но прашање е дали некому му е дозволено да се нудат откупни цени што се под производните. Сите механизми за решавање на проблемите со цените се во рацете на ресорното министерство. Едноставно треба да се постапи и според сегашните законски решенија, а тоа е дека постои обврска да се интервенира од државата во случаи кога се нудат ниски откупни цени, како што е за годинашната реколта – вели Димитриевски.
Националната мрежа на земјоделци бара интервентен откуп на пченицата. Претседателот на Националната мрежа на земјоделци, Ѓорѓи Каракашев вели дека треба да се земи во предвид законските одредби односно, Член 40 од Законот за земјоделие и рурален развој, а во кој какошто вели децидно се уредува условите под кои државата врши интервентен откуп по која методологија динамика и цени.
-Во Член 40, односно овде јасно се посочува дека доколку пазарната цена на житариците е под производната цена тогаш државата по закон врши интервентен откуп со цел заштита на цените континуитет во производството како и економска одржливост житариците како стратешка култура за државата. Притоа интервентната откупна цена мора да е над производната цена зголемена за 25%. Овде законот е јасен и недвосмислен и секој обид да се релативизира состојбата со некои скромни средства под име субвенции и со цени далеку под производните е ништо друго освен обичен и вулгарен грабеж и уништување на индивидуалното земјоделско производство во државата, вели Каракашев.