Бројот на активни случаи во земјава изнесува 13.412 од кои најголем број или 5858 се во Скопје. Во Тетово има 1184 активни случаи, во Куманово – 898, во Гостивар – 688, во Струга – 620, во Охрид- 590, во Струмица – 565, во Кичево – 483… Според вчера објавените податоци на Институтот за јавно здравје, при направени 4.553 тестирања, се регистрирани нови 464 случаи со Ковид-19, 23 починати и 435 оздравени пациенти.
Досега во земјата се направени вкупно 1.223.054 тестирања на Ковид-19. Вкупниот број Ковид-дијагностицирани лица во земјава од почетокот на епидемијата изнесува 183.523, бројот на оздравени пациенти е 163.852, а на починати е 6.259.
Министерството за здравство пренесе делови од новата студија на американскиот Центар за превенција и контрола на болести, која, како што се посочува, „јасно ја нагласува ефикасноста на вакцините против Ковид-19 против сериозни болести или смрт“.
Оваа студија е спроведена во период од повеќе од три месеци, испитувајќи ги хоспитализациите и смртните случаи од вирусот Ковид-19 и заклучоците од истата покажуваат дека дури 10 пати е поголема веројатноста невакцинираните луѓе да бидат хоспитализирани, односно 11 пати е поголема веројатноста дека ќе имаат смртен исход од болеста.
