Осум пати досега Новак Ѓоковиќ и Рафаел Надал се сретнувале на Ролан Гарос, но синоќешниот маратон сигурно е еден од најимпресивните кои се одиграле. Не само на овој Гренд слем, туку севкупно.
„Мое е задоволството што одиграв ваков меч против Рафа. Ова сигурно е еден од најголемите дуели кои сме ги одиграле во Париз. Претставата дополнително беше разубавена од фантастичната атмосфера и неверојатната енергија од трибините“, изјави првиот светски рекет по пласманот во финалето каде го очекува Стефанос Циципас.
И Циципас, како и Зверев, Тим, Медведев, Рубљов играат фантастичен тенис, но она што Новак Ѓоковиќ и Рафаел Надал се способни да го направат кога ќе се соочат е некој друг спорт.
„Многу е тешко да се најдат зборови да се опише како е да се игра против Рафа, толкав притисок постои. А притисокот е привилегија. Секогаш се трудам да ги унапредам своите карактерни особини, да бидам поквалитетен како личност, но и како тенисер“, заклучи Новак.
