Претседателот на САД Џозеф Бајден и претседателката на Европската комисија Урсула фон дер Лајен вчера се договориле да се координираат за прашања од заеднички интерес, вклучително и за Западен Балкан.
Во телефонскиот разговор со фон дер Лајан, Бајден истакнал дека ја поддржува Европската унија и е посветен на подобрување и заживување на партнерството меѓу САД и ЕУ, се вели во соопштението на Белата куќа, додавајќи дека лидерите се согласиле да ги суспендираат тарифите поврзани со споровите во Светската трговска организација и да работат на нивно решавање, пренесува Гласот на Америка.
„Лидерите разговараа за важноста на тесната соработка меѓу Соединетите држави и ЕУ во борбата против пандемијата и за зајакнување на глобалната здравствена безбедност, постигнување одржливо глобално економско закрепнување, справување со климатските промени и зајакнување на демократијата. „Тие, исто така, се согласија да се координираат за прашања од заеднички интерес, вклучително и Кина, Русија, Белорусија, Украина и Западен Балкан“, се заклучува во соопштението.
Од стапувањето на должноста Бајден најави обновување на односите со европските партнери и враќање на мултилатералната дипломатија.
