Конгресот во САД го усвои пакетот помош вреден 1.900 милијарди долари

Претставничкиот дом на Соединетите Американски Држави (САД) во саботата усвои пакет помош за закрепнување од пандемијата на коронавирусот вреден 1.900 милијарди долари, за чие усвојување инсистираше и американскиот претседател Џо Бајден.

Пакетот помош беше усвоен во Долниот дом со 219 гласа „за“ и 212 „против“, а сега ќе биде испратен до Сенатот.

Помошта е наменета да плати за вакцини и медицинска опрема и за нова рунда итна финансиска помош за домаќинствата, малите бизниси и државните и локалните власти.

Пакетот помош, исто така, вклучува 1.400 американски долари за директна помош за физички лица, 400 американски долари неделно бенефиции за невработени до 29 август и помош за граѓани кои имаат потешкотии во плаќањето кирија и хипотеки за време на пандемијата на коронавирусот.

Ако овој пакет за економска поддршка биде усвоен во Сенатот, тогаш тој ќе оди на потпис кај претседателот Бајден.