Најстарата пиварница во светот е откриена во регионот Абидос во градот Сохаг, на југот на Египет.
Египетското Министерство за антиквитети и туризам изјави дека најстарата пиварница во светот е откриена во регионот Абидос, како резултат на заедничката работа на египетските и американските археолози.
„Се проценува дека пиварата работела во периодот од 3273 година п.н.е. до 2987 година п.н.е., до периодот на фараонот Нармер, еден од првите египетски фараони“, соопшти Министерството.
Беше објавено дека фабриката се состоела од осум големи оддели што се користеле како единици за подготовка и секој оддел имал „приближно 40 сливови распоредени во два реда за да се загрее мешавина од житни култури и вода“.
Археолозите веруваат дека пиварниците се изградени за да снабдуваат пиво за кралски ритуали и настани. Се проценува дека истовремено може да се произведат 22.400 литри пиво.
Група британски археолози во 20 век споменале постоење на ваква фабрика, но не дале детални информации за нејзината локација.
