До сабота, 16 јануари, околу 22.000 лица биле вакцинирани против коронавирусот во Србија, а околу 280.000 граѓани поднеле барање за вакцинација, што е повеќе од очекуваното, изјави за РТС државниот секретар во Министерството за здравство на Република Србија, Мирсад Џерлек.
Џерлек рече дека вакцинацијата на граѓаните кои се регистрирале преку онлајн апликацијата во Белград и десет градови низ Србија поминала без проблеми и несакани активности, пренесува РТС.
Тој истакна дека Србија е единствената земја во Европа што користи три вакцини од трите најмоќни земји во светот – САД, Русија и Кина. „Чекаме дозвола од Агенцијата за лекови (АЛИМС) да ја одобри кинеската вакцина и ќе се обидеме да го зголемиме интензитетот на имунизација во текот на следната недела, односно за два или три дена и да ги прошириме групите на население“, рече Џерлек.
Тој изјави дека следната недела се очекуваат нови 250.000 дози на руската вакцина Спутник, а утре се очекуваат околу 20.000 дози на вакцината Фајзер. Државниот секретар во Министерството за здравство посочи дека од утре, покрај здравствените домови, граѓаните ќе се вакцинираат и на пунктови надвор од здравствените установи и дека еден пункт ќе биде отворен во салата на Белградскиот саем, како и во другите градови во Србија.
„Сакаме да отвориме над 300 контролни пунктови. Три до десет тимови за вакцинација ќе работат на овие контролни пунктови. Ќе се обидеме да вакцинираме од 50 до 100 лица на час. Сакам да ја зголемиме оваа бројка од 22.000 за пет пати оваа недела затоа што е исклучително важно за нас секој ден и на секој час да започнеме со заштита на нашите граѓани од коронавирусот “, рече Џерлек.
