Градот Скопје и Агенцијата SWOT Research ги избраа најдобрите трговски објекти во Скопје, во повеќе дејности, во рамките на традиционалната манифестација „Месец на трговијата 2020″, која годинава се организира по 14–ти пат.
Оваа година, поради пандемијата со ковид-19 вирусот изборот на најдобар трговски објект е организиран поинаку, и денеска, раководителот на Секторот за Локален економски развој на Град Скопје, Марко Тодоров, на претставниците на најдобрите трговски објекти плакетите им ги додели плакетите на отворено пред бараките на Град Скопје.
Проектот „Месец на трговијата“ произлегува од Програмата за финансирање на проекти за развој на занаетчиството, угостителството и трговијата на град Скопје за 2020 година, а целта е да се поттикне развојот на трговијата и занаетчиството и да се укаже на потребата од следење на современите текови и примената на модерните технологии во овие стопански гранки, како и да се изврши сондирање на квалитетот на услугите во трговијата во повеќе дејности на ниво на град Скопје, со цел стимулирање на трговците за подобра услуга, снабдување со квалитетна стока за продажба, како и постигнување атрактивни цени на производите.
Овој проект се организираше во периодот од 1 ноември до 30 ноември 2020 година. Тајните купувачи по направената евалуација изготвија извештаи кои се изработени според примарните критериуми, кои оваа година поради пандемијата беа дополнети со нови критериуми, и тоа:
- Изглед на продажното место – (ознаки, хигиена, уредност, изложеност на производи)
- Прв контакт – (поздравување, изглед на вработен и контакт со очи)
- COVID – 19 критериуми – (носење заштитна маска, средства за дезинфекција, маркери за држење дистанца)
- Услуга кон купувачите – (љубезност, насмевка, волја да се излезе во пресрет и професионалност на вработен)
- Продажни вештини – (поставување прашања, претставување и познавање на производите, нудење дополнителни производи, проактивност)
- Завршен контакт – (заблагодарување и поздравување на заминување)
- Задоволство од купувачкото искуство на тајните купувачи – (субјективно мислење за повторна посета и препорака)
На крајот, следеше сумирање на резултатите, од кои произлегоа заклучоци и препораки за подобрување на услугата во иднина, и според оценките, избрани се најдобрите три трговски објекти во повеќе дејности, кои ќе добијат признанија за својот квалитет и престиж, и тоа во следните дејности:
Категорија „Апарати за домаќинство, бела техника и се за дома“
- Сетек
- Техномаркет
- Нептун
Категорија „Модни додатоци и накит“
- SWAROVSKI
- Miss Spice
- Tesoro
Категорија „Компјутерска, аудио – видео и телекомуникациска опрема“
- Телекомпродавница
- ANHOCH PC Market
- I Style
Категорија „Парфимерии и козметика“
- L’ OCCITANE
- Ри – Ма
- MAC cosmetics
Категорија „Салони за мебел“
- Кристина Дамил
- Југоекспорт Стил
- Акрон
Категорија „Супермаркети“
- Рамстор
- Рептил
- Гранап
Категорија „Бутици“
- KOTON
- Springfield
- Sara fashion
Категорија „Домаќинство“
- Coin Casa
- LUSSO
- VICKO
Вкупниот резултат остварен од сите трговски објекти кои се испитуваа оваа година е повисок во споредба со вкупниот резултат остварен во 2019 година. И покрај дополнителните стандарди кои беа мерени оваа година и вонредните услови за работа во време на пандемија, трговците успеаја да го подигнат нивото на квалитет на услуга.
Покровител на четиринаесеттиот избор на најдобар трговски објект е Град Скопје, а се реализира преку Секторот за локален економски развој, во соработка со Агенцијата SWOT Research, специјализирана агенција со експертиза и искуство во анализа на квалитетот на услугата.
Значајно е да се нагласи дека во нашата земја и трговските субјекти беа под силен удар од пандемијата. Како и во светот, така и кај нас многу работници останаа без работа, а се зголеми неизвесноста и несигурноста кај вработените, поради што беа донесени повеќе пакет мерки за помош и одржливост на стопанството од страна на Владата на Република Северна Македонија.
