Агенцијата за храна и лекови на САД (ФДА) во деталната анализа заклучи дека првата вакцина против Ковид-19, чија употреба се разгледува во САД и ја произведуваат американски „Фајзер“ и германски Бионтек, „ги исполни пропишаните критериуми за успех“ во клиничкото испитување, што сугерира дека оваа агенција ќе даде „зелено светло“ за нејзино користење уште за време на викендот.
Анализата на ФДА потенцира разни „познати придобивки“ од вакцината, кои вклучуваат „намалување на ризикот од зараза со Ковид-19 најмалку седум дена по втората доза“, објави „Волстрит журнал“ и потсетува дека, кога станува збор за вакцината Фајзер, потребно е едно лице да прими две дози со цел нејзиното дејство да биде целосно.
ФДА додаде дека друга предност на оваа вакцина е тоа што го намалува ризикот некој да биде инфициран со коронавирусот помеѓу првата и втората доза. Друга важна предност, како што е наведено од агенција, е дека „го намалува ризикот од тешки форми на Ковид-19 во кое било време по првата доза“.
ФДА денес објави две одделни анализи, едната спроведена од нејзините научници, а другата спроведена од „Фајзер“ и „Бионтек“.
Како што се очекува, кога вакцината ќе биде одобрена, први ќе ја примат здравствените работници и луѓето во домовите за стари лица.
Велика Британија е првата земја што ги одобри вакцините Фајзер и Бионтек, а денес започна масовна вакцинација.
