Лидерот на ДУИ Али Ахмети во гостувањето на емисијата „Клик плус“ на телевизија 21, кажа дека се разменети понуди и документи со Бугарија за кои смета дека не е време да ги сподели со јавноста, и додаде дека треба да покажеме заедништво.
– Мислам дека не е време да споделувам со јавноста за понудите или последните документи кои се разменети. Ќе почекаме да ја видиме реакцијата од Бугарија – изјави Ахмети, истакнувајќи надеж дека до крајот на годинава ќе има добри вести од Софија.
Лидерот на ДУИ истакна дека ова е важен момент за да се демонстрира заедништво во решавање на овој спор.
– Многу важен момент е за да демонстрира пред сите граѓани, особено пред нашите сожители Македонци, дека ги делиме доброто и лошото и дека ќе стоиме рамо до рамо заедно и во решавање на овој спор, потенцираше лидерот на ДУИ.
