Севернокорејскиот врховен лидер Ким Јонг-Ун за време на својот говор на воената парада викендов „со кнедла во грлото“ им се извини на своите сограѓани што не успеал да ги подобри нивните животи.
Ројтерс известува дека на прославата на 75-годишнината од основањето на Работничката партија, која има целосна моќ во Северна Кореја, прво им се заблагодари на илјадниците војници за сите нивни жртви, вклучително и помагајќи да се спречи ширењето на новиот коронавирус во земјата.
Лидерот рече дека е благодарен што „ниту еден Севернокореец не е заразен со вирусот“.
Ким Јонг-Ун, сепак, исто така рече дека влијанието на пандемиските мерки, меѓународните санкции и влијанието на неколку тајфуни, заедно ја спречиле неговата влада да го подобри животот на граѓаните.
„Моите напори и искреност не беа доволни за да го спасат нашиот народ од животните проблеми“, рече врховниот водач.
Снимката од неговиот говор покажува дека пред расплаканите и потресени војници, и пред другите граѓани, тој зборувал со зацрвенето лице, како со грутка во грлото, и во еден момент правејќи движење како да избришал солза.
Уште за време на викендот, аналитичарите на Западот забележаа дека воената парада се одржуваше во крајно невообичаени услови, за прв пат во зори, а сега многумина толкуваат дека потегот на Ким Јонг-Ун е показател дека големиот лидер е под голем притисок од противниците и проблемите во земјата.
ООН претходно изјави дека 40 проценти од Корејците на Северот немаат доволно храна. Во меѓувреме, според различните извештаи на агенцијата, ова е дополнително влошено од големите поплави поради тајфуните и натамошното зајакнување на веќе затворените граници за да се задржи пандемијата надвор од границите на Северна Кореја
