Новата студија за глобалната пандемија открила дека оние заразени со коронавирусот можат да имаат предвидлива низа на симптоми што се разликува од онаа на грипот и другите корона вируси.
До денес, доказите покажуваат дека најверојатната низа на почетни симптоми на КОВИД-19 обично започнува со треска, проследена со кашлица и болка во мускулите, проследена со гадење и / или повраќање и на крајот дијареја.
Иако самите симптоми не се особено уникатни, редоследот по кој се појавуваат се разликува од оној на другите респираторни вируси, а авторите на студијата веруваат дека нивниот модел би можел да помогне да се разликуваат нови случаи и да се ограничи ширењето на болеста.
Користејќи ги податоците на Светската здравствена организација (СЗО) за повеќе од 55.000 потврдени случаи во Кина, авторите го споредиле редоследот на симптомите на КОВИД-19 со илјадници случаи на грип собрани од Универзитетот во Мичиген, скоро 150 случаи на САРС во Торонто и мал број случаи МЕРС од Кореја.
Важноста на редот
Откриено е дека грипот започнува со кашлица и треска. Додека МЕРС и САРС можат да започнат слично на КОВИД-19, нивниот долен гастроинтестинален систем обично е првиот што е зафатен, што доведува до дијареја, гадење и повраќање.
„Редоследот на симптомите е важен“, рече Џозеф Ларсен, истражувач за компјутерска биологија и биоинформатика на Универзитетот во Јужна Каролина.
„Да се знае дека секоја болест напредува поинаку, значи дека лекарите можат побрзо да утврдат дали некој има КОВИД-19 или има друга болест, што може да им помогне да донесат подобри одлуки за третман“.
Кога истражувачите ги анализирале симптомите на КОВИД-19 кај 500.000 пациенти, тие откриле „најчеста секвенца на препознатливи симптоми … кои се различни од оние на другите респираторни заболувања“.
Дури и кога беа вклучени други симптоми како што се болка во грлото, главоболка и замор, редот на четирите најверојатни почетни симптоми остана ист.
Бидејќи температурата е прва, мерењето на температурата може да биде релевантен механизам за испитување.
Од Американскиот центар за контрола и превенција на болести (ЦДЦ) веќе советуваат мерење на температурата пред лицата да излезат од изолација, а новите истражувања ја поддржаа таа препорака.
„Ние не ги предлагаме првичните симптоми како дијагностички тест, но како можен знак дека треба да се тестира“, напишале авторите.
Студијата беше објавена во списанието „Frontiers in Public Health“.
