Денеска добиваме нов Дом на демократијата на Северна Македонија и на сите македонски граѓани. Нашиот Парламент денеска ја одржа првата конститутивна седница со учество на народните пратеници кои ја изразуваат волјата на граѓаните кои гласаа на Парламентарните избори на 15 јули, изјави по завршувањето на седницата претседателот на СДСМ, Зоран Заев.
– Во име на СДСМ, коалицијата МОЖЕМЕ и на сите 46 избрани наши пратеници, уште еднаш им благодарам на граѓаните за демократскиот капацитет и одговорноста кои беа демонстрирани на изборите – и уште еднаш уверувам дека нашите 46 пратеници, а сигурен сум дека има уште многу такви пратеници во овој состав – заедно ќе покажеме уште поголема одговорност кон сопствениот народ и сопствената држава – ќе градиме независен парламент – ќе ги претставуваме пред се интересите на граѓаните и на државата, пред партиските интереси – ќе му служиме на народот!- рече Заев.
Тој истакна дека од денеска почнуваат преговори за нов четири-годишен, полн мандат на стабилно мнозинство во Парламентот, мнозинство кое ќе донесе стабилна и посветена четири-годишна Влада која е подготвена да сработи.
– Ќе разговараме исклучиво за формирање Влада која се грижи за сите граѓани подеднакво, ослободени од какви било етнички предрасуди или национализми, Влада која нема никакви дилеми кога е во прашање нашиот заеднички пат кој се вика “Северна Македонија – Едно општество за сите”. Ќе разговараме за Влада која е решена и која ќе се бори со криминалот и корупцијата на сите нивоа – секој ќе си ја носи сопствената одговорност, без разлика дали доаѓа од партија, од општина, од институција, дали е експерт, функционер, познат или непознат.Особено внимание ќе посветиме на делот за прочистување на правосудството и на проверката на потекло на пари и капитал кај секој функционер, по пат на систем што заеднички ќе го договориме, изјави Заев.
Заев потенцираше дека идните чинители во новата Влада ќе треба да се подготвени и за сериозна реформа на јавната администрација – која ќе донесе ефикасно служење на потребите на граѓаните, но и промена со која обемот на администрацијата ќе се намали за 20%, помал број министри и за рационализација на јавните служби, но за поголем број и побрзи услуги за граѓаните.
Според него главните принципи се: платите да продолжат да растат, вложување во младите и во рамномерниот регионален развој, водење посебна грижа за најсиромашните граѓани и постојана поддршка на домашниот приватен сектор.
Јакнењето на економскиот стандард на сите наши граѓани ќе биде императив на новата Влада, рече Заев.
– Очекувам дека за 10 – 15 дена ќе имаме исход од овие преговори и дека многу скоро ќе ги кренеме македонските институции во полн капацитет да можат да се справуваат со најголемиот предизвик, невидливиот непријател КОВИД-19. Пред нас е есента која носи нова учебна година, нова грејна сезона, нови предизвици на болниците – пред нас е заедничка борба за јавното здравје и за економски напредок, изјави Заев.